Заменик-претседателот на македонската Влада, Муса Џафери, од утре ќе престојува во дводневна работна посета на Брисел каде ќе оствари голем број средби со високи преставници на Европската унија и НАТО, јавува дописникот на МИА од европската престолнина.
Како што е официјално најавено, Џафери, кој во Владата е задолжен за спроведување на Рамковниот договор, утре најпрво во Европскиот парламент ќе се сретне со известувачот за Република Македонија, Ричард Ховит. Потоа, Џафери ќе се сретне со генералниот секретар на Европската служба за надворешни работи (ЕЕАС), Пјер Вимонт, а попладнето е закажан и состанок со првиот човек на Директоратот за проширување во Европската комисија, Стефано Санино.
За в петок, единствено познато е дека Џафери во седиштето на НАТО ќе има билатерална средба со заменик-генералниот секретар на Алијансата, Александер Вершбоу. Темата на разговорите на македонскиот вицепремиер со неговите соговорници се претпоставува дека ќе биде спроведувањето на Рамковниот договор и исполнувањето на обврските од него во државата.