Претседателот на Собранието на Република Македонија Трајко Вељаноски е загрижен за состојбите во законодавниот дом, и затоа за утре закажа координативна средба на која ќе биде разгледана динамиката и деблокирањето на донесувањето на буџетот на Република Македонија за 2013 година.
„Загрижен поради насилничкото однесување на одредени пратеници во текот на денешниот ден и блокирањето на работењето на комисиите, надлежни за донесувањето на буџетот на Република Македонија за 2013 година, за утре во 10 часот закажувам Координативна средба на која ќе биде разгледана динамиката и деблокирањето на донесувањето на Буџетот на Република Македонија за 2013 година“, вели Вељаноски.
На средбата, како што информира собраниската прес-служба, покрај потпреседателите на Собранието и координаторите на пратеничките групи ги повика и претседателот на Комисијата за финансирање и буџет Марјанчо Николов, претседателката на Законодавно – правната комисија Благородна Дулиќ и вицепремиерот и министер за финансии Зоран Ставрески.