Претседателот на Собранието на Република Македонија Трајко Вељаноски во рамки на посетата на Турција беше примен од турскиот претседателот Абдула Ѓул, а денеска во Истанбул ќе има средба со фанариотскиот православен патријарх Вартоломеј, јави известувачот на МИА.
Турскиот претседател истакна дека Македонија има многу силно лоби во Турција за привлекување инвестиции и оти земјата има потенцијал кој треба да се искористи.
Турција ја поддржува Македонија во евроатланските интеграции, а турскиот претседател лично се заложил кај ганералниот секретар на НАТО Андрес Фог Расмусен за прием на земјата во Алијансата.
Големото посебно пријателство меѓу двете земји, според турскиот претседател Ѓул, е поради големата сличност и блискоста на народите.
Вељаноски му се заблагодарил на Ѓул за големата поддршка што оваа земја и ја дава на Македонија и го информирал турскиот претседател за актуелната политичка состојба во земјата, за добиената доверба на изборите која, како што рекол, треба да се оправда пред граѓаните. – За нас е особен приоритет членството во НАТО, рекол Вељаноски. Спикерот посочил дека и покрај кризата, Македонија има добар економски раст и оти се надева и очекува нови турски инвестиции.
На средбата со Ѓул присуствуваше и претседателот на Големото национално собранние Џемил Чичек, на чија покана Вељански е во посета на Турција и со кого вчера имаше тет-а-тет средба, а потоа и средба со парламентарната делегација.
Претседателот на Собранието Трајко Вељаноски денеска во Истанбул ќе има средба со фанариотскиот православен патријарх Вартоломеј.
Средбата на Вељаноски со патријархот е во рамки на дводневната официјална посета на претседателот на македонското Собрание на Турција. Првиот парламентарец последен пат имаше средба со патријархот во 2010 година.