Претседателот на Собранието Трајко Велјаноски на средбата со словенечкиот колега Грегор Вирант, искажа благодарност за постојаноста во принципиелната политика и поддршка на Република Словенија кон Република Македонија, особено на патот на евро-атлантските интеграции.
Го информираше Вирант дека и покрај исходот од Самитот во Чикаго во поглед на прашањето на проширување на Алијансата, Македонија и натаму останува посветена во исполнувањето на реформите и активна во исполнувањето на обврските во рамките на мисиите на НАТО.
На средбата со Вирант на која присуствуваа и потпретседателите на словенечкиот Парламент и координаторите на пратеничките групи, беше искажано задоволство од билатерални односи на двете држави, соопшти собраниската прес-служба.
Претседателот на Државниот збор Вирант се осврна на прашањето на спорот кој Република Македонија го има со јужниот сосед, искажувајќи лично убедување дека барањето од Грција не е рационално и е претерано, бидејќи не може од една држава да се бара да се откаже од името и идентитетот. Тој искажа убеденост дека со заеднички напори ќе се најде решение.
Министерот за надворешни работи на Република Словенија Карл Ерјавец, пак, на средбата со Вељаноски и собраниската делегација, истакна дека сите држави од регионот треба да се интегрираат во Европската унија, бидејќи Унијата без државите од Западен Балкан не е тоа што треба да биде.
Велјаноски имаше средба и со премиерот Јанез Јанша, кого го запозна со неподеленоста на политичките партии, но и на етничките заедници, во однос на стратешките определби на Република Македонија – интегрирањето во НАТО и ЕУ и во силната посветеност на евроатлантскиот пат.
Во собраниската делегација се и пратениците Ристо Манчев, Мевмет Џемајловски, Оливер Спасовски и Амди Бајрам.