Претседателот на Собранието Трајко Вељаноски денеска го прими новоименуваниот амбасадор на Народна Република Кина во Република Македонија Вен Џеншун.
На средбата, претседателот Вељаноски му посака добредојде и успешна работа во новиот мандат на амбасадорот Џеншун. Двајцата соговорници се согласија дека Република Македонија и Народна Република Кина имаат одлична билатерална соработка, пријателски односи и изразија желба таквата соработка да продолжи и понатаму работејќи на нови проекти.
Како што соопшти Кабинетот на претседателот на Собранието, на средбата се разговараше за досегашните успешни проекти остварени во соработка со претходните кинески амбасадори во Македонија, како проектите за изградба на автопатот Миладиновци – Штип и автопатот Кичево – Охрид, кои се реализираат преку соработка и поддршка на Владата на Народна Република Кина. Овие проекти, како што се наведува, претставуваат дополнителен стимул за продлабочување на соработката меѓу двете земји во сите сфери на заеднички интерес.
Амбасадорот Џеншун изрази брагодарност за средбата и пренесе честитки до Вељаноски за неговиот повторен избор за претседател на Собранието од Претседателот на Секинескиот Народен Конгрес и од свое лично име.
Претседателот на Собранието Вељаноски, заблагодарувајќи се за честитките, го истакна значењето на парламентарната дипломатија во унапредувањето на добрите односи меѓу двете земји. Упати отворена покана до својот колега, претседателот на Секинескиот народен конгрес на Народна Република Кина, Џанг Деџианг за официјална посета на Република Македонија.