Еврокомесарот за проширување, Оливер Вархеји, изјави денеска дека сѐ помали се шансите дека Северна Македонија и Албанија до крајот на годинава ќе ги започнат преговорите за пристап во Европската унија.
„Сѐ уште се надевам, но за жал, сѐ помалку е извесно дека оваа година можеме да ги усвоиме преговарачките рамки,“ рече Вархеји во надворешно-политичкиот одбор на Европскиот парламент, за време на расправата за ситуацијата со Западниот Балкан, 25 години по Дејтонскиот договор.
Еврокомесарот додаде дека Европската комисија и германското претседателство со ЕУ и натаму работат со земјите-членки на обидите да се најде решение за новиот евроинтеграциски исчекор на Скопје и Тирана.
Според Вархеји, Македонија „мора да вложи дополнителни напори за да им излезе во пресрет на загриженостите на Бугарија“, за да се најде решение кое ќе биде прифатливо за двете земји.