Судскиот совет на денешната седница не успеа да избере тројца нови судии во Врховниот суд.
За изборот на судиите е потребно двотретинско мнозинство од членовите на Советот, а според претседателката на Судскиот совет, Александра Зафировска немало притисоци ниту политички влијанија за изборот на новите судии.
Судскиот Совет не избираше и претседател на Врховниот суд, за која функција подолго време се шпекулира дека ќе и припадне на поранешната претседателка на скопскиот Кривичен суд и актуелен апелационен судија, Лидија Неделкова. Во трка е и судијата Ристо Катевеновски, а актуелниот претседател Јово Вангеловски, иако се пријави за реизбор, сепак, ја повлекол својата кандидатура.
Повлекувањето на Вангеловски го потврди и претседателката на Судскиот совет Александра Зафировска.
Неуспешен беше и обидот за избор на претседател на Кривичниот суд и огласот ќе биде повторен. Поддршка од советниците за напредување во Апелациониот суд не доби ниту судијката Павлина Христова која ја изрече пресудата за „Пајажина“.