Во пакетот закони од сферата на финансиите, Владата на денешната 111 седница го усвои и Предлог – закон за изменување и дополнување на Законот за данокот на добивка, по скратена постапка.
Целта на предложеното изменување и дополнување на Законот, како што појаснуваат од владината прес-служба, е да се изврши појаснување и допрецизирање на одредбите од Законот кои се однесуваат на даночното ослободување за дадените донации во спортот преку ваучер системот, трансферните цени, непрофитните организации, непризнатите расходи и други прашања, заради подобрување на нивната имплементација.
На денешната седница, на предлог на Министерството за финансии е утврден и Предлог – законот за изменување и дополнување на Законот за преземање на акционерски друштва, по скратена постапка.
Предложените измени и дополнувања на Законот имаат за цел да се прецизираат критериумите за заедничко дејствување, како и известувањата до Комисијата во однос на заедничкото дејствување заради заштитата на малите акционери, да се поттикне тргувањето со хартии од вредност, и да се олесни постапката за преземање на акционерски друштва од страна на странски инвеститори.
