Уставниот суд утре ќе расправа за иницијативата на ДУИ за оценка на уставноста на одлуките на претседателот на Собранието Трајко Вељаноски за распуштање на Собранието.
Иницијативата, која е денеска додадена на изменетиот дневен ред, е поднесена од пратеникот на ДУИ Талат Џафери, и е единствена точна на седницата. Од Уставниот суд итноста за ставање на дневен ред на оваа точка ја објаснуваат со тоа дека ова прашање не може да чека.
Уставните судии во февруари годинава веќе расправаа и ја отфрлија Иницијативата на пратеникот Павле Трајанов од Демократскиот сојуз и на Тодор Петров од Светскиот македонски конгрес, за одложеното распуштање на Собранието. Уставниот суд ја отфрли Иницијативата поднесена од Трајанов и од Петров, за оценување на уставноста на Одлуката на Собранието на Република Македонија да се самораспушти со одложено дејство.
Судот се прогласи и за ненадлежен да одлучува за поединечни акти на Собранието како што е оваа одлука.
Од Уставниот суд посочуваат дека Иницијативата поднесена од Талат Џафери има целосно нови елементи и оти за овој предмет има нова анализа.