По налог на Обвинителството за гонење организиран криминал и корупција утрово полицијата уапси десетина лица, меѓу кои и поранешниот министер за транспорт, Миле Јанакиески.
Станува збор за истрага за оттуѓување, односно продажба на државно земјиште со што буџетот е оштетен за над 2,5 милиони евра, дознава „А1 он“.
Меѓу уапсените, покрај државните службеници од транспорт, вработени во катастар и нотари, има сопственик на фирма и државен правобранител. Обвинителството ги товари за злоупотреба на службената положба и овластување и за несовесно работење во службата.
Станува збор за незаконско постапување за градба на три парцели за хотелски комплекс покрај Вардар од другата страна на градскиот парк во Скопје. Проневера била извршена и со парцелата на која требаше да се градат шпанските скали во центарот на Скопје.
Еден осомничен досега не е пронајден. Останатите се изведени пред судија на претходна постапка и се очекува да почнат рочиштата за притвор.