Полицијата го приведе Ристо Новачевски, кој е кум на азилантот Никола Груевски, по барање на Обвинителството за гонење на организиран криминал и корупција. Новачевски е уапсен поради спорните плацеви на Водно, а каде како купувачи се јавуваат офшор-компании.
Една од фирмите, сопственик на дел од земјиштето кое се протега на повеќе од 10 илјади квадратни метри на Водно е „Сирах Инженеринг“, чијшто основач и сто процентен сопственик е фирмата „Сирах Лимитед“ од Белизе, сопственост на Новачевски.
Во неговиот дом, полицијата изврши и претрес. Тој ќе биде изведен пред судија на претходна постапка.
Инаку, истрагата на Обинителството за земјиштето на Водно опфаќа повеќе бизнисмени, како и поранешен функционер. За Новачевски е познато дека беше член на Одборот на директори на Акционерското друштво за стопанисување со деловен простор во државна сопственост.
Од Обвинителството засега нема информации за кои дела ги гонат осомничените.