Во село Стримница, тетовско, било одземено патничко возило „фолксваген голф“, кое било оставено со клуч на бравата, информира МВР.
Според пријавата, на 26 февруари 2026 година во 22:40 часот во СВР Тетово, 78-годишниот Ќ.И. пријавил дека возилото, сопственост на друго лице, а кое тој го користел, било одземено додека било паркирано во селото.
Лицето кое го одзело возилото се упатило кон село Палатица, каде предизвикало сообраќајна незгода удирајќи во објект на маркет, по што го напуштило местото на настанот.
Во незгодата со телесни повреди се здобила 23-годишната Л.К. од село Палатица, вработена во маркетот. Повредите ѝ биле констатирани во Клиничкиот центар во Тетово, а причинета е и материјална штета на објектот.
По наредба на јавен обвинител, возилото е одземено и пренесено во кругот на СВР Тетово. Се преземаат мерки за пронаоѓање на сторителот и за целосно расчистување на случајот.