Од денеска е укината забраната за движење на тешки товарни возила со вкупна маса над 15 тони. За камионите кои сообраќаа на патиштата низ државата од 1 јули беше ограничено движењето во викендите и во деновите со екстремно високи температури.
Камионите не смееја да се движат низ патиштата од 17 до 22 часот во петок, од 9 до 18 часот во сабота и од 9 до 22 часот во недела. Во деновите со екстремно високи температури забранaта важеше од понеделник до четврток од 11 до 17 часот.
До денеска важеше и ограничувањето за движење на тешки товарни возила над 7,5 тони на патните правци Гостивар – Охрид, Охрид – Ресен и Охрид – Свети Наум.
На подрачјето на Град Скопје уште денеска важи забраната за движење на тешки товарни возила во временски период од 10 до 20 часот, а веќе од утре се укинува оваа времена мерка.
