Ректорот на Универзитетот „Св. Кирил и Методиј“ во Скопје Велимир Стојковски и ректорот на Универзитетот „Бен Гурион“ во Бир Шева, Израел, Зви Хакоен, потпишаа Меморандум за соработка во областа на образованието, науката и културата.
Целта на Меморандумот, како што соопшти денеска Универзитетот „Св. Кирил и Методиј“ е да се зајакне и официјализира научната интеракција меѓу двете институции преку поттикнување на размена на академски и административен кадар и студенти.
Соработката меѓу универзитетите ќе се одвива во рамките на областите застапени на двата универзитета.
Со Меморандумот се предвидуваат заеднички научни и истражувачки проекти, размена на наставен кадар, размена на студенти, организирање на заеднички конференции и работилници, како и размена на публикации, универзитетски изданија, книги и соработка во комуникациските мрежи.