Универзитетот „Св. Кирил и Методиј“ на научна конференција идниот месец ќе расправа за местото и улогата на универзитетите во креирањето и унапредувањето на високото образование во Македонија со посебен акцент на процесите за проверка, обезбедување и подигнување на квалитетот во високото образование.
Како што соопшти Ректорската управа, на конференцијата закажана за 16 јануари 2015 година на Економскиот факултет во Скопје, ќе учествуваат единиците и придружните членки на УКИМ, другите универзитети во Република Македонија, студентите и претставници на Министерството за образование и наука (МОН).
Ректорската управа на УКИМ вчера, на седница, покрај другите прашања, посебно внимание посветил на предлозите на МОН поврзани со реформите во високото образование.
– Во тој контекст, едногласно е констатирано дека Информацијата за воведување државен испит за студентите на универзитетите во Република Македонија беше доставена за произнесување до единиците и придружните членки на Универзитетот. Сите единици и придружни членки на УКИМ доставија мислења, предлози и забелешки, кои на 16 декември 2014 година се доставени до Министерството за образование и наука, информира Управата.
Во тек е расправа на единиците на Универзитетот и по другите предлог-законски решенија поврзани со високото образование, по која мислењата, предлозите и забелешките на единиците и придружните членки на УКИМ ќе бидат доставени до Министерството за образование и наука.
Ректорската управа, како што наведува, очекува мислењата, предлозите и забелешките да бидат земени предвид од надлежните органи.