Среде бел ден, во центар на град, јавно се коле и жртвува животно за „среќа“ при изградба на зграда, додека луѓе гледаат, снимаат и молчат како тоа да е нормална појава во 2026 година; а други се шокирани и истраумирани од она на што сведочат во 21 век, реагираат од Анима Мунди, Здружение за заштита на животните.
Паралелно, гледаме уште една болна слика на општествен распад- луѓе што се фотографираат со заклани свињи во двор, се фалат на Фејсбук, промовираат и нормализираат насилство, додека публика во коментари им честита.
Постојат луѓе што работат во кланици од сиромаштија и нужда, и многумина психички се распаѓаат од хоророт на кој секојдневно се изложени. А овде гледаме нешто уште пострашно; луѓе што не само што не чувствуваат тежина, туку уживаат, се фотографираат и се фалат со страдањето, касапењето и смртта на свесни живи битија.
Ова не може да е традиција и никако не може да се третира како нормалност.
Тоа е општествена девијација и морбидна потреба насилството да се нормализира и претвори во слава.
И не, ова не смее да се релативизира и спакува како обичај , или наш менталитет.
Општество што ужива во туѓо страдање независно дали се работи за човек или животно опасно се деградира, социолошки, психолошки деформира, ја губи емпатијата и чувството за граница помеѓу човечност и бруталност. Се обезличува и нема сенс за туѓо страдање. Бараме итна реакција и најстроги санкции.
Бараме одговорност за секој што организира, учествува, промовира и јавно слави вакво насилство.
Ако МВР итно не реагира и не ги уапси сите инволвирани, ако ваквите чинови на суровост се третираат како тековност, нормалност, тогаш не пропаѓаат само животните. Пропаѓаме сите! Ако е така, воопшто не треба да не чуди што секојдневието ни е буквално црна хроника – читаме и слушаме за злоставувања, насилство, убиства секој ден! Го повикуваме министерот јавно да соопшти кои се завршниците по овие случувања и најсурово постапување со животните, наведуваат од Анима Мунди.