Финансиската полиција го уапси Борче Марковски, сопственик на компанијата „Марковски Компани ДООЕЛ“ од Битола и почесен конзул на Белорусија во Македонија.
Во рамки на акцијата, приведени се и неколку поранешни директори од енергетскиот комбинат РЕК Битола.
Според првичните информации, Марковски и неговата компанија се поврзуваат со сомнителни договори со РЕК Битола, најголемиот енергетски капацитет во државата. „Марковски Компани“ во изминатите години добила повеќе тендери од овој комбинат, вредни неколку милиони евра.
Неофицијално, Финансиската полиција го сомничи Марковски за местење тендер во вредност од околу 100 милиони денари, односно околу 1,6 милиони евра, со што наводно бил оштетен државниот буџет.
Од Министерството за внатрешни работи засега нема официјални информации за случајот, а истрагата е во тек.