Со програма во која има 79 проекти, со кои ќе се поттикне развојот и напредокот во сите сфери во општина Сопиште, ја побара поддршката на 24 март од жителите на оваа општина кандидатот за градоначалник на ВМРО-ДПМНЕ Стефче Трпковски, вечерва на митинг во општината.
– Во програмата нема вишок зборови и лажни ветувања. Секој збор е одмерен, а ветувањето реално, порача тој.
Трпковски истакна дека граѓаните на општина Сопиште заслужуваат одговорен градоначалник и верен општински Совет кој ќе работи за потребите на граѓаните.
Пратеникот во Собранието на Република Македонија од ВМРО-ДПМНЕ Владимир Ѓорчев потенцира дека општина Сопиште ќе добие човек кој е домаќин, посветен и кој ја сака оваа локална самоуправа. Според него тој е лојален, стабилен и добар, а Сопиште ќе добие одличен градоначалник.
Ѓорчев потенцира дека и во кризни и во најтешки времиња Владата на Никола Груевски е одговорна, реализира инвестиции и отвора фабрики.
СДСМ, како што рече, зборува за општи теми, за демагогија и реченици кои ги слушаме 20 години, уште од време на транзицијата и приватизацијата.
На поддршка за Трпковски на митингот повика и министерот за надворешни работи Никола Попоски, кој посочи дека градоначалник кој нема целосна поддршка и од Советот ќе наиде на многу проблеми, уценувања и предизвици. – Затоа мора сите одлучно да го поддржите Стефче Трпковски и советничката листа. Ние очекуваме дека на овој начин најдобро ќе можеме да одговориме на сите проекти што се ставени во програмата за следниот период. Она што е клучно за нас е да го задржиме принципот на отчетност и отвореност за се она со кое сме настапиле пред вас и за што сме ја побарале вашата доверба, рече Попски и додаде дека во секој момент се отворени за сугестиите на граѓаните.
Вреднувајте го она што сме го направиле, порача Попоски, вреднувајте ги делата, но и ентузијазмот со кој настапуваме.
– За Македонија нема друг пат, освен патот кон нов напредок. Кон нови дела за подобра Македонија и за подобра општина Сопиште, рече Попоски.