Охридската полиција пронајде и приведе три од шесте лица кои вчера ја ограбија златарницата „Прима Голд“во охридската чаршија. Приведените се романски државјани, А.Л.(23), А.Р.(32) и М.Ф.Р(16), против кои е поднесена кривична пријава за извршено дело „тешка кражба“.
Од страна на истражен судија на тројцата им е одредена мерка притвор во траење од 24 односно 48 часа, а полицијата презема дополнителни мерки за пронаоѓање на други три лица кои се уште се во бегство.
Кражбата била извршена вчера околу 15 часот, кога шесте лица влегле во продавницата и додека дел од нив со разни прашања за накитот и цените се обидувала да и го одвлече вниманието на вработената, останатите од стаклениот пулт со изложен накит краделе златен и сребрен накит.
Секторот за внатрешни работи Охрид презема интензивни мерки за пронаоѓање на другите три лица членови на романската група, која во текот на вчерашниот ден со патничко моторно возило пристигнала во Охрид. Веднаш потоа, тие разгледале неколку златари во чаршијата по што, во „Прима Голд„ ја извршиле тешката кражба.