Македонската полиција и Фронтекс вчера уапсиле тројца Грци кои шверцувале ловна муниција во земјава.
Во текот на денот биле откриени три одделни случаи на обид за внес во државата на непријавена ловна муниција, при што вкупно се пронајдени и одземени околу 200 патрони.
Во првиот случај, околу 10:20 часот, при контрола на патничко возило „Дахатсу Териос“ со грчки регистрации, управувано од 38-годишниот Х.С., биле откриени над 130 парчиња ловна муниција сокриени на повеќе локации во возилото.
Околу еден час подоцна, во 11:20 часот, во возило „Хонда“ управувано од 76-годишниот К.К., биле пронајдени 24 патрони ловна муниција.
Во третиот случај, околу 16:30 часот, при контрола на возило „Сузуки Витара“ управувано од Т.П. (62), биле откриени повеќе од 40 патрони непријавена ловна муниција.
Лицата се приведени, а пронајдената муниција е одземена. За случаите е известено надлежното обвинителство и се преземаат мерки за понатамошно расчистување на настаните.