Во Кривопаланечкото село Голема Црцорија, во месноста Голеш, на торомеѓето помеѓу Република Македонија, Србија и Бугарија денеска се одржа јубилејната 10-та трилатерална меѓународна средба „Краиште 2014“.
Традиционално средбата се одржува на големиот христијански празник Петровден, во организација на општините Крива Паланка, Босилеград и Ќустендил.
На средбата присуствуваа градоначалниците на трите погранични општини, како и голем број жители на овие градови, локално население и иселеници кои потекнуваат од овие краишта.
Средбата секоја година е збогатена со настапите на голем број фолклорни ансамбли и културно уметнички друштва од трите општини кои ги презентираат богатата традиција, фолклклорот и културата на овие погранични региони преку сплетот на народните игри и ора.
Жителите на Крива Паланка, Ќустендил и Босилеград на овој ден можат да ја минуваат државната граница само со лични карти или патни исправи од 8 до 20 часот.