Потрошувачот ако правилно ја избере тарифата од тарифниот правилник пропишан од Регулаторната комисија може да плати многу помалку за потрошена електрична енергија.
Ова е еден од главните заклучоци на денешната трибина на тема „Како до помали сметки за струја кај стопанствениците што плаќаат индустриска тарифа“, организирана од општинската организација на ДОМ Велес.
На трибината беше истакнато дека максиграфот како елемент за мерење на максимално преземената 15-минутна моќност е добар инструмент за адекватно плаќање на тоа што го троши секој субјект кој користи индустриска цена на електричната енергија. Со негово користење сметката може да се намали за најмалку 30 отсто.
Беше посочено дека слабото познавање на законските прописи што ги нуди тарифниот систем е причина доста потрошувачи да не ја користат можноста за нерегистрирање на максиграфот во ноќната тарифа.