Три пожари се случија денеска во Кавадарци поради проблеми со оџаци, информираше Илчо Богевски, командир на Територијалната противпожарна единица од овој град.
– Во 1 и во 2 часот по полноќ и во 9 часот претпладне ТППЕ Кавадарци интервенираше на три места каде беше повикана за да ги изгасни пожарите. Причината поради која настанале пожарите на повеќе наврати беше споменувана како предупредување до сите кои користат дрво за огрев и стари оџаци. Очигледно граѓаните не постапиле по препораките и затоа имаа неприлика денеска. Поради неисчистени и неисправно изведени оџаци на куќи каде во поткровјето има кара-таван сопствениците имаа неприлики со огнот, соопшти Богевски.
Командирот рече дека пожарите се брзо изгаснати, санирани се и се без жртви и повредени, а предизвикана е мала материјална штета.
– Се апелира граѓаните да ги меморираат телефоните 193 и 043/410-141 бидејќи понекогаш се губи драгоцено време барајќи го бројот, или паниката го прави своето, како што беше при и случајот со пријавувањето за еден од пожарите. Се повикуваат граѓаните да ја проверат состојбата во поткровјето со оџаците, но и застарената електрична инсталација која исто така може да предизвика пожар, предупреди Богевски.