Центарци денеска прашуваа и дискутираа за сите прашања од областа на урбанизмот, планирањето и уредување на просторот во општината.
Отворениот ден со надлежната комисија на Советот на општината го организираше Центарот на заедницата на општина Центар, со цел да им овозможи на граѓаните да ги изнесат своите проблеми и заеднички да се побара решение за нив.
Претседателот на комисијата, советникот Јован Тагасовски, информираше дека во фаза на изработка се 17 Детални Урбанистички Планови и нивната содржина е достапна на веб страната на општината. Граѓаните ќе можат да се запознаат со предложените решенија пред да започне јавната расправа.
Жителка на Дебар Маало е задоволна од транспарентноста и апелираше, како што рече, да се реши хаосот на улиците на Дебар Маало.
„Досега ги загубивме сите битки за заштита на животната средина со Аларова и Тодоровиќ. Благодарение на нив, имаме паркирани коли насекаде, степен на изграденост од 100% и нема доволно зеленило“, рече таа.
Законски, ќе се ревидираат сите ДУП-ови и ќе се усогласат со ГУП-от. Добро е, и’ одговорија надлежните во општината, да се слушнат сите мислења и предлози и активно да се учествува на јавните расправи за истите.
Жителите на Дебар Маало беа инфромирани дека бензинска пумпа кај Буњаковец нема да има, а на седницата, на 1-ви јули, како што вчера изјави градоначалникот на општина Центар, Андреј Жерновски, ќе се предложи ДУП Дебар Маало 1 и Дебар Маало 2 без бензинска пумпа.
Одлуката Жерновски ја донел по средбата со жителите и нивните искажани ставови.
Едните, особено оние кои живеат во непосредна близина на пазарот, се согласиле и ги поздравиле предложените решенија, но поголемиот број сакале реконструкција и модернизација на пазарчето, но без бензинска пумпа.
Жители од старо Водно бараат да се смени актуелниот ДУП и наместо индивидуални куќи, да се вратат решенијата од стариот ДУП, со предвидени станбени згради.
Од општината информираат дека донесено е решение за отстранување на мрежестата конструкција и компресорите на маркетот на Рамстор, веднаш до Зеленото Пазарче, ќе се реши седум-месечниот проблем на жителите, кои се жалеа на неснослива бучава и вибрации, предизвикани од компресорите.
Ова е вториот отворен ден и како што посочи Мартин Попов од Центарот на заедницата, со ова се остварува долгорочната цел за вклучување на граѓаните во донесувањето на одлуките на локално ниво, поголема транспарентност на работењето на општината и отвореност кон граѓаните.