Министерот за внатрешни работи Панче Тошковски, на одбележувањето на 7 Мај – Денот на македонската полиција, порача дека МВР продолжува со модернизација и бескомпромисна борба против криминалот и корупцијата.
На централната свеченост во кругот на МВР, Тошковски рече дека во изминатата година вкупниот криминалитет е намален за повеќе од шест проценти, а ефикасноста на полицијата достигнала 67,2 проценти.
„Вкупниот криминалитет е на најниско ниво во последните 20 години. Сузбиени се 16 организирани криминални групи со 205 лица, а реализирани се и повеќе постапки во борбата против корупцијата, вклучително и случаи од висок профил“, изјави Тошковски.
Тој нагласи дека паралелно со безбедносните активности, се работи и на подобрување на условите и услугите за граѓаните.
Според него, реновирани се управните служби во Скопје, отворени се осум нови управни служби низ државата, а по повеќе од 15 години набавени се 120 нови службени возила.
Директорот на Бирото за јавна безбедност, Александар Јанев, порача дека полицијата ќе продолжи со „одлучна и системска“ борба против криминалните групи.
„Никој не е над законот, без селективност, без привилегии и без компромис“, рече Јанев.
Пред почетокот на свеченоста, делегации на МВР положија цвеќе на спомен-обележјата на загинатите полициски службеници.
Одбележувањето на Денот на македонската полиција продолжува попладнево во Градскиот парк во Скопје со изложба на полициска опрема и музичка програма.