Кандидатот за градоначалник на општина Центар од ВМРО-ДПМНЕ и Коалицијата „За подобра Македонија“ Владимир Тодоровиќ и претседателот на Здружението за заштита на животните „Анима Мунди“ Стојче Велковски денеска потпишаа Меморандум за соработка.
– Ја искажувам својата волја преку меѓуопштинска соработка да обезбедам користење земјиште, на кое би се изградил соодветен стационар за згрижување и вдомување на животните со капацитет од 500-тина животни годишно. Притоа, општината ќе обезбеди поддршка и помош за целокупното функционирање во делот на храна, грижа за животните и соодветен персонал, согласно ингеренциите на општината, изјави Тодоровиќ.
Ќе промовираме, како што рече, исклучиво хуманост, вдомување, стерилизација на животните и нивна вакцинација како единствен адекватен, хуман пристап за решавање на проблемот со бездомните кучиња и заштита на граѓаните.
Велковски ги наведе активностите кои Здружението би ги реализирало наредниот период, како конципирање на детална Програма за работење на стационарот согласно најуспешните европски практики и препораките на Светската здравствена организација за надминување на проблемот со бездомните кучиња. Дел од активностите се и обезбедување на волонтери, едукација, пред се деца и млади, организација на настани за учениците од основните училишта од општина Центар, континуирано вдомување и организација на големи акции за промоција на вдомување на миленик, наместо купување, водење на Регистар на вдомени кучиња…