Министерот за здравство Никола Тодоров кој денеска престојува во работна посета на Рим, ќе се сретне со својот италијански колега Ренато Балдузи.
Како што соопшти Министерството за здравство, Тодоров и Балдузи ќе разговараат за остварување соработка за обука на лекари, спроведување добра медицинска пракса и посета на нивни лекари во Македонија со акцент на интервенции кои не се вршат во државата.
Во рамки на еднодневната работна посета, Тодоров ќе посети три поголеми болници, Сан Џовани, Џенели, како и педијатриската Бамбино Џезу во Ватикан, со која ќе биде потпишан договор за соработка. Целта е размена на искуства и медицински персонал меѓу Република Македонија и Република Италија.