Транспарентност Македонија вршеше мониторинг од мај до ноември 2017-та година во четири општини: Центар, Битола, Тетово и Куманово.
Се испитуваше достапноста до информации, транспарентното донесување на одлуки, отчетноста и граѓанското учество во носењето на одлуките. Највисок индекс на транспарентност има општина Центар.
Достапноста на информации е највисока во Центар и во Битола, а се мониторирало дали општинскиот буџет е јавно објавен и лесно достапен, дали е објавен навремено, дали информациите кои се даваат кон граѓаните, невладините организации и приватниот сектор во однос на приходите и расходите се лесно достапни.
Исто така, предмет на мониторинг била достапноста на информациите за договорите и уделот на јавните општински финансии при јавни набавки, финансирање на граѓански организации, спортски клубови и културни манифестации.
Општина Центар покажала далеку најдобри резултати за достапноста на информациите за реализираните постапки при финансиските распределби, за донесените финансиски одлуки и во транспарентно носење на одлуки.
И во однос на отчетноста, општина Центар е највисоко рангирана во мониторираниот период.
Општина Центар може да се пофали и со степенот на граѓанско учество бидејќи според мониторингот општината се консултирала со граѓаните во процесот на донесување на буџетски одлуки, на информациите за буџетот, во однос на можноста граѓаните да учествуваат во планирањето и креирањето на општинскиот буџет, како и за соработката со невладините организации и граѓанскиот сектор.
Сите овие податоци се поттик за општина Центар да продолжи со транспарентно, отчетно и одговорно работење.