Дванаесетгодишно дете од Скопје е тешко повредено по инцидент со петарда што се случил на новогодишната ноќ во општина Аеродром, соопшти Министерството за внатрешни работи.
На 31 декември 2025 година во 23:26 часот, од Ургентниот центар при Комплексот клиники „Мајка Тереза“ во Скопје било пријавено дека кај нив е донесен малолетник со тешки телесни повреди. Според пријавеното, инцидентот се случил околу 23:00 часот во парк на подрачјето на општина Аеродром, кога на детето му пукнала петарда во раката.
Како што информира МВР, петардата била фрлена од негов соученик, а повредениот малолетник се обидел да ја тргне со рака за да не му падне на глава, при што дошло до експлозија и сериозни повреди.
Се преземаат мерки за целосно расчистување на случајот.
