Тешко повредениот триесетгодишник од село Битуше, гостиварско кој синоќа беше прободен со нож пред НУБ „Св.Климент Охридски“ во Скопје, по што побегнал и во безсознание паднал кај Музејот на македонската борба, а потоа бил пренесен во Клиниката по хирушки болести „Св.Наум Охридски“, е во стабилна состојба и се наоѓа на Одделот за интензивно лекување.
Ова денеска за МИА го изјави директорката на Клиниката, Јасмина Чабуковска која рече дека повредениот синоќа бил во животно загрозувачка состојба и итно бил опериран.
– Со искрварување со повреда на крвни садови во градниот кош повредениот итно е однесен во хирушка сала, интервенирано е. Моментално е во стабилна состојба на Одделот за интензивно лекување, додаде Чабуковска.
Триесетгодишникот заедно со уште три лица од Делчево и Пехчево синоќа биле нападнати од група од 15 до 20 млади лица, при што едно од нив со нож му нанело повреда во пределот на грбот.