Шеесет и петгодишен маж од Скопје загина во сообраќајна несреќа што се случила вчера попладне на локалниот пат меѓу селата Кучевиште и Кучевишка Бара.
Како што соопшти МВР, несреќата била пријавена во СВР Скопје на 17 февруари 2026 година во 15:20 часот, а во неа учествувале патничко возило „форд фиеста“ со скопски регистарски ознаки, управувано од В.П. (65) од Скопје, и патничко возило „фолксваген голф“, исто така со скопски таблички, управувано од Ж.С. (57) од село Кучевиште.
На местото на несреќата починал возачот на „фордот“, а смртта ја констатирал лекар од Итната медицинска помош. Возачот на „фолксвагенот“ се здобил со телесни повреди, констатирани во Комплексот клиники „Мајка Тереза“ во Скопје.
По наредба на јавен обвинител, телото на починатиот е предадено на обдукција, а увид на местото на настанот извршила увидна екипа на СВР Скопје.
