Околу 150 ученици и 70 ментори од кумановските основни училишта учествуваат на четвртата манифестација „Техносаенс“ што се одржува во средното општинско училиште „Наце Буѓони“ во Куманово. Учениците се натпреваруваат во повеќе категории во природни науки, математика, технички науки.
– Натпреварот има за цел да го популаризира изучувањето на природните и техничките науки и да се види кое од основните училишта е најуспешно во овие науки, изјави директорката на училиштето Лидија Михајловска.
Наредната година кога манифестацијата одбележува пет години од одржувањето, информираше Михајловска, планирано е и учество на претставници на Машинскиот и на Факултетот за електротехника и информациски технологии.
Во дворот на училиштето поставени се повеќе штандови на кои учениците ги презентираат своите изработки претежно од областа на техничките науки.
– На натпреварот учествуваат ученици од вишите одделнија од девтеолетката кои се истакнале со своите трудови, кои посебно се талентирани во областа на програмирање, изработуваат трудови, како и презентации, изјави професроката по машински предмети од „Наце Буѓони“ Катерина Ѓорѓиевска.
Преку оваа манифестација училиштето се промовира меѓу полуматураните кои имаат желба да ги продлабочат стручните знаења во машинската и елктро-техничката струка,но и во здравствената струка.