Здружението на граѓани за култура и уметност „Ан-блок“ – Скопје традиционално од 1998 година го реализира проектот „Заедно со вас да ги направиме децата среќни” во Клиниката за детски болести во Скопје.
Покрај другите активности, во рамките на овој проект е организирање пригодна програма по повод новогодишните празници, наменета за децата кои во тоа време се на лекување во Клиниката за детски болести во Скопје на хемато-онколошкиот оддел.
Пригодната програма по повод новогодишните празници ќе се реализира в среда (27 декември) со почеток во 13:30 часот на хемато-онколошкиот оддел. Оваа година ќе се презентира театарската претстава „Дедо Мраз, снежната кралица и зајачињата” од страна на театарот „Арт Вени Види”, а во претставата ќе играат: Викторија Анѓушева, Душица Стојановска, Ѓорѓи Тодоровски-Трупче и Симон Манасковски. Дедо Мараз на децата ќе им подели новогодишни подароци (навлаки за душеци и перници). Подароците ги обезбедија претставници од Здружението „Ан-блок“ со финансиска помош од страна на Град Скопје.
Организаторот на настанот, како и на сите досега реализирани проектни активности е Поликсена Илиоска, претседател на Здружението „Ан-блок“ и добитник на државната награда „Мајка Тереза“ и „13 Ноември“, а здружението на граѓани за култура и уметност „Ан-блок“ – Скопје има добиено благодарници за покажаната хуманост од страна на Клинички центар Скопје и од ЈЗУ Универзитетската клиниката за детски болести – Скопје.