Промени во проектот „Мој термин“ на Министерството за здравство, односно само награди наместо казни за докторите, најави денеска министерот за здравство Арбен Таравари на одбележувањето 25 години од Лекарската комора на Македонија.
– Јас сум за промени во Мој термин, а веќе утре ќе имам состанок со претставниците на Мој термин. Учинокот ќе остане, а нема да има негативен учинок. Платата ќе си биде 100 проценти, а ќе има и наградени доктори, односно тие што ќе бидат најуспешни, најави Таравари.
Наградите за докторите, според него, треба да се обезбедат од парите од вторите директори на клиниките за кои, како што рече, тие места треба да се укинат и средствата да се пренаменат за неколку успешни лекари во болниците.
Министерот најави состанок на тим за креирање на стратегијата на лекарите која ќе биде Национална стратегија за здравството 2017-2020, која според него ќе биде уставот на лекарите.
