Илија Јовановски е нов директор на Општата болница во Прилеп, Наке Гогов на Општата болница во Струмица, а Исмаил Вахити во Специјалната болница за белодробни заболувања во Лешок. Виктор Камнар е нов раководител на Ортопедија на Универзитетската клиника за трауматологија, ортопедија, анестезија и реанимација, интензивно лекување и Ургентен центар (ТОАРИЛУЦ).
Ова денеска на прес-конференција го соопшти министерот за здравство Арбен Таравари.
Одговарајќи на новинарско прашање, Таравари рече дека назначувањето на новите директори не оди бавно. – Подобро е да најдеме добри решенија отколку да брзаме и да бидат решенија кои ќе бидат одбиени од колективот и од пацинетите, изјави Таравари.
Истакна дека досега нема никакви несогласувања и оти се дискутира отворено за сите предложени имиња за клиниките.
– Се обидуваме по информации кои ги добиваме и од вработените во клиниките да го најдеме најдоброто решение. Не велам дека секогаш ќе бидат најдобри решенија, може да има и многу подобри, но ќе се обидеме и ќе дадеме се од себе да дадеме оптимални решенија, рече Таравари.
Министерот за здравство потенцира дека е многу важно новите директори да бидат прифатени од здравствените установи каде што работат. Политичката припадност, како што рече, е интимна, приватна работа и не можеме да се мешаме, а генерално гледаме луѓе кои вредат.
– Имаме многу добри доктори, кои се квалитетни на сите клиники и се надевам дека наскоро ќе имаме решенија, рече Таравари.
На новинарско прашање за недостигот од реагенси во Институтот за јаво здравје-Скопје, Таравари рече дека минусот со реагенси во оваа здравствена установа е со години и оти тука треба да интервенира Владата за како да се средат долговите.
– Се работи за многу важна институција која треба да извршува многу повеќе испитувања отколку што испитува сега. Мислам дека таа институција е маргинализирана во македонското здравство и заслужува многу повеќе отколку оваа состојба што ја има, рече Таравари.