Ќе се залагам Министерството за локална самоуправа да биде успешно и да се реализираат сите проекти, нагласи Тахир Хани на денешното примопредавање на функцијата министер за локална самоуправа од страна на досегашниот министер Невзат Бејта.
Хани потенцира дека за него претставува голема чест што ќе го замени досегашниот министер Невзат Бејта.
– Првпат во едно демократско општество, во Република Македонија се случува еден министер да даде оставка за да може на локалните избори да не ја злоупотребува функцијата министер, рече Хани.
Тој информира дека на кратката средба со Невзат Бејта добил информации за досегашните проекти кои се реализирани, како и оние кои се во тек.
Бејта му посака на Тахир Хани да продолжи да работи во интерес на сите граѓани на Република Македонија и додаде оти за тоа Хани ќе има многу добри услови. Бејта истакна дека на средбата со Хани разговарале за повеќе проекти меѓу кои продолжување на изградбата на плоштадот „Скендер бег“ во Скопје, спортска сала во Зајас, дом за стари лица во Битола.
