СВР-Битола според востановената традиција и денеска на 1 Мај испрати совети и препораки до возачите и други учесници во сообраќајот, за почитување на сообраќајните правила и прописи со посебен акцент на конзумирањето алкохол, приспособување на брзината спрема условите и состојбата на патот, како и воздржување од предизвикување на разни облици на нарушување на јавниот ред и мир.
Од СВР – Битола посочуваат дека во текот на празничниов ден со цел да се задржи безбедноста на сите граѓани на задоволително ниво, ќе се преземаат акциски контроли.
– Во интерес на безбедноста на граѓаните, СВР-Битола, апелира до сите учесници во сообраќајот да ги почитуваат сообраќајните правила и прописи со посебен акцент на управување на возило под дејство на алкохол, присподобување на брзината спрема условите, состојбата на патот, ограничувањата како и паркирање на места кои се определени за таа намена со цел нормално и непречено одвивање на сообраќајот, истакна Сања Стаматова, портпарол на СВР-Битола.
Стаматова информира дека во поглед на сообраќајот за првото тромесечие во 2018 година регистрирале вкупно 69 сообраќајни незгоди со потешки последици, повредени се 107 лица, а на патиштата во сообраќајна незгода загинале четири лица, сите на подрачјето на општината Прилеп.
Од СВР-Битола порачуваат во текот на денешниот празничен ден да не се пали оган на отворен простор и на необезбедени места, меѓи, пасишта и други површини. Да не се фрлаат отпушоци, стаклени шишиња и друга стаклена амбалажа и отпад. Доколку се забележи пожар-веднаш да се извести Центарот за управување со кризи или локалната противпожарна единица.