Во Основен суд Кавадарци денеска се одржа рочиште во врска со судската постапка против кавадаречкиот градоначалник Александар Панов, обвинет за поткуп при избори и гласање.
Во изјава за медиумите, тој рече дека не го сторил делото што му е на товар и оти не се точни тврдењата на сведокот дека му дал илјада денари за да гласа за ВМРО-ДПМНЕ. Додаде дека се работи за политичка хајка.
На новинарско прашање дали давал помош во време на кампања, одговори дека во такви услови не давал помош бидејќи, како што посочи, правник е и е свесен што смее да прави во тој период.
Кавадарчанецот Сали Мемедов, кој се појави како сведок, во изјава за медиумите потврди дека добил илјада денари од градоначалникот за да гласа за ВМРО-ДПМНЕ. – Јас не сум ни од таа партија, ни од оваа. Кога ги зедов парите се потпишав на едно обично ливче. Ми рече, да си помогнеме едни на други и да гласам за ВМРО-ДПМНЕ, рече Мемедов.
Пресудата, како што најави судијата Лазар Нанев, ќе биде донесена на 18-ти овој месец.