Во однос на одлуката на Кривичниот совет од Апелациониот суд Скопје во врска со притворот на поранешниот директор на УБК Сашо Мијалков, Судскиот совет на Република Северна Македонија информира дека согласно членот 2 од Законот за Судски совет, Советот ја обезбедува и ја гарантира самостојноста и независноста на судската власт.
-Според членот 11 од Законот за судовите, судијата одлучува непристрасно со примена на законот врз слободна оцена на доказите и дека се забранува секој облик на влијание врз независноста, непристрасноста и самостојноста на судијата во вршењето на судиската функција по кој било основ и од кој било субјект, се вели во соопштението.
Од Судскиот совет укажуваат дека судската власт е независна и самостојна, а Советот е орган кој постапува исклучиво според закон и не делува под политички влијанија, а истото се однесува и за работата на судиите.
-Оттаму, врз основа на надлежностите, сите алатки кои Советот ги има на располагање во оваа фаза, а со оглед дека судскиот предмет е активен, остануваат интерни за Советот. За секоја следна постапка или евентуална одлука Судскиот совет навремено ќе ја извести јавноста, информираат од Советот.
По прифаќање на гаранцијата од 11 106 501 евро на Мијалков, вчера Апелацискиот суд во Скопје мерката притвор ја преиначи во мерка претпазливост, односно одземање на пасошот и обврска да се јавува во суд. Оваа мерка притвор на Мијалков му беше изречена во врска со предметот „Трезор“, каде е неправосилно осуден на осум години затвор.
Потоа, Основното јавно обвинителство поднесе Предлог за определување на мерка притвор за Сашо Мијалков, по обвинение за „перење пари и други приноси од казниво дело“ во предметот „Плацовите на Водно“, со што Основниот кривичен суд – Скопје го прифати предлогот и одреди мерка притвор од 30 дена за Мијалков.
Тој има првостепена пресуда и во случајот „Таргет – Тврдина“ со која е осуден на 12 години затвор, а обвинет е и во случаите „Плацови на Водно“ и „Титаник 2“, а осомничен е и во предметот „Империја“. Во „Тортура“, пак, доби ослободителна пресуда.
Сашо Мијалков се наоѓа во затворот во Шуто Оризари од 26 февруари годинава, откако претходно неколку дена беше во куќен притвор.