Вработените од судската полиција најавуваат протест преку кој ќе го искажат своето незадоволство поради неисполнување на нивните права предвидени во Законот за судска служба.
Претседателот на Одборот за судска полиција Драган Јосевски денеска на прес-конференција рече дека бараат исполнување на нивните права согласно Законот, односно исплата на надоместокот за работа за време на празници и во денови на одмор, како и исплата на надоместокот за работа изложена на висок ризик.
– Судската полиција не е задоволна. Покрај со тужби со кои ќе ги бараме нашите права, незадоволството ќе го изразиме и со протест, најави Јосевски.
Досега испратиле писма со барања до надлежните, но, како што истакна Јосевски, немаат добиено никаков одговор.
Од Синдикатот на УПОЗ во кој членува Одборот за судска полиција, информираа дека до Уставниот суд е поведена и постапка за оценување на уставноста на членот од Законот за судска служба со кој им се ускратува можноста на вработените во судската полиција да конкурираат за местото командант на судската полиција.