Агенцијата за финансиска поддршка во земјоделството и руралниот развој, денеска ги исплати субвенциите за одгледувачите на полјоделски култури. Станува збор за исплата по мерката 1.1 Директни плаќања по обработлива земјоделска површина за сите полјоделски култури, освен тутунот.
Без селекција и во еден ден на сметките на 23.108 субјекти исплативме 376.122.517 денари, рече директорот на АФПЗРР, Николче Бабовски кој денеска заедно со министерот за земјоделство, шумарство и водостопанство, Трајан Димковски присуствуваше на почетокот на реконструкцијата на локалниот пат меѓу скопските села Виниче и Страчинци.
Корисници на оваа финансиска поддршка, потсети Бабовски, се земјоделски стопанства кои во производната 2018 – 2019 година имаат засеани и ожнеани површини со пченица, јачмен, пченка, рж, овес, ориз, тритикале, хељда, сирак, соја и сончоглед.
Политиките на навремена и неселективна исплата на субвенциите продолжуваат токму во периодот кога средствата им се најпотребни. Со ова докажуваме дека ние се грижиме за земјоделците.
Денеска се исплатени субвенции за полјоделски култури во висина од 6,3 милиони евра за над 23 илјади земјоделци, напомена Димковски.
Димковски и Бабовски појаснија дека нема застој во исплатите на субвенциите.
Владата од почетокот на мандатот до денеска има исплатено 341,5 милиони евра од Програмата за земјоделство и рурален развој.