Стотици студенти влегоа во аулата на Филозофскиот факултет. Со ова велат и симболично го ослободуваат Универзитетот. Студентите прогласија Автономна зона.
Најавуваат дека не се откажуваат од битката за слободен универзитет и негова автономија и дека ќе имаат редовни и постојани дежурства. Го повикаа јавниот сервис да ги покрива овие настани бидејќи и тие плаќаат такса за МТВ.
На премиерот Груевски му порачаа дека нема да наседнат на неговото, како што велат, наводно омекнување.
„Немаме намера да седиме дома и да се надеваме дека кармата ќе го стори останатото. До овде стигнавме, затоа што сме сложни и затоа што гласно на сите начини се спротивставуваме на наметнатите реформи во високото образование. Да го освоиме назад Универзитетот, време е за автономна зона“, порачуваат Пленумци.
Тие дојдоа со ранци и вреќи за спиење за да дежураат и да ја бранат Слободната универзитетска зона.
