Струшката полиција поднесе кривична пријава против 25-годишниот стружанец И.Л. кој е осомничен дека извршил две казнени дела, „разбојништво“ и „недозволено изработување, држење и тргување со оружје или распрскувачки материи“.
Како што информира портпаролот на СВР Охрид Стефан Димоски, вчера околу 9 часот и 25 минути, И.Л. со капа фантомка и со пиштол во раката влегол во менувачницата „К-Виса“ лоцирана во градскиот пазар во Струга и од вработената ги побарал парите од сефот.
– Заканувајќи и’ се со убиство, тој со пиштолот ја удрил вработената по главата по што, од сефот и од пулт-касата почнал да ги зема парите и да ги става во црна ташна што ја имал со себе. Во моментот, вработената на висок тон повикала помош поради што И.Л. почнал да бега при што е совладан а потоа и приведен, вели Димоски.
При претрес во неговиот дом, полициските службеници пронашле една рачна бомба М-75 ставена во пластична обвивка.
Пиштолот марка „Црвена застава“ што бил сопственост на неговиот татко со кој го извршил разбојништвото, рамката со пет куршуми заедно со пронајдената бомба се одземени и предадени на вештачење во Министерството за внатрешни работи во Скопје.
Основниот суд во Струга на И.Л. му одреди мерка притвор во траење од 30 дена.