Полициската станица од Струга поднесе кривична пријава против 51-годишниот А.М. од Струга поради постоење основи на сомнение за сторено казнено дело „бесправно градење“.
Како што информира портпаролот на СВР Охрид Стефан Димоски, пријавениот, на 17 декември минатата година во атарот на струшкото село Драслајца започнал да гради објект-стовариште кој се наоѓа на катарстарска парцела број 932/2 КО-Драслајца, северно од индустриската зона во која се наоѓаат фабриките „Борис Кидрич“ и „Полипласт“.
– На барање на полициската станица од Струга, овластен градежен инспектор од општина Струга извршил контрола и увид на објектот во градба. Според записникот за инспекциски надзор, инвеститорот, сега пријавениот А.М., на катастарската парцела во непосредна близина на мостот на реката Сатеска, започнал со градење стовариште без претходно добиено одобрение за градба. Градежниот инспектор затекнал бетонски темелни стопи во градба кои биле анкерисани со челични столбови, вели Димоски.
Според него, градежната инспекција на Општина Струга веднаш донела решение со кое од инвеститорот се бара да преземе мерки за отстранување на објектот и локацијата да ја доведе во првобитната состојба.