Здружението за кардиоваскуларна хирургија на Република Македонија денеска ќе одржи трето собрание на тема „Акутна бубрежна инсуфициенција на одделите за интензивно лекување“. Доктори од Македонија и од странство ќе дебатираат за проблемот со бубрежно затајување, кое може да се случи, посебно по тешка операција, дури и кај пациенти кои претходно немале никаков проблем со бубрезите.
Ќе се дискутира за причините, за подобра превентива, нови начини на лекување и како да се спречи да прерасне во хроничен проблем, што е ново во светот и што се применува во Македонија.
Акутната бубрежна инсуфициенција, или скратено АБИ, е ненадејно губење на способноста на бубрезите да ја вршат нивната основна функција – елиминирање на вишокот течности и електролити, како и отпадниот материјал од крвта.
Акутната бубрежна инсуфициенција може да биде фатална и бара интензивен третман. Но таа може да биде реверзибилна состојба. Ако пациентот е во добра здравствена состојба, тогаш големи се шансите при навремено реагирање да се поврати нормалната бубрежна функција.
