Безбедносната состојба на граѓаните на Општина Карпош, нарушувањето на јавниот ред и мир во сите урбани заедници и почитувањето на сообраќајните правила беа главна тема на разговорот на вчерашната средба меѓу градоначалникот на Општина Карпош, Стевчо Јакимовски, и првиот полицаец на Карпош, Роберт Петрушевски.
Состанокот се одржа на иницијатива на градоначалникот на Општина Карпош, а на него присуствуваа и секретарите на 14 урбани заедници во Карпош.
Секретарите на урбаните заедници од оваа скопска општина го изразија револтот на граѓаните од неактивноста и од слабите резултати на полето на превенцијата и откривањето на кражби и разбојништва низ општината. Според изјавите на секретарите, во одделни урбани заедници, речиси да нема куќа која не била цел на разбојници и крадци во изминативе години. Она што е најлошо, велат најупатените од овој дел на општинската администрација, е што многу мал од овие кривични дела се расветлени, а украдените предмети речиси никогаш не им се вратени на граѓаните.
Во разговорите беше посочено дека станува збор за 10-15 разбојнички групи од не повеќе од 50- тина лица, и на чие криминално дејство час поскоро треба да му се стави крај.
Околу проблемот со обезбедување јавен ред и мир, секретарите на урбаните заедници од Карпош точно ги посочија местата каде во раните утрински часови одредени групи буквално „дивеат“ и го вознемируваат населението. Бидејќи се наоѓаме во пресрет на летните одмори и вечери, договорено е да се преземат поенергични мерки против прекршителите на јавниот ред и мир за да им се врати мирот на граѓаните.
Во доменот на сообраќајот, на средбата е констатирано дека учесниците во него, особено возачите на автомобили и мотори, често ги кршат сообраќајните прописи. Притоа, или возат во спротивен правец или не го почитуваат ограничувањето на дозволената брзина, особено на пешачките премини и на премините покрај училиштата.
Посебен акцент беше ставен на Кејот на Вардар, каде возењето мопеди и мотори по пешачката патека стана практика со што се загрозува и животот на рекреативците. На средбата беше договорено полицијата да го зголеми присуството во овој дел на општината и да преземе соодветни законски постапки да се санкционира ваквото однесување.
Исто така, констатирано е дека во континуитет се оштетува државниот и општинскиот имот, посебно во делот кај урбаната опрема, и од полицијата е побарано час поскоро да се идентификуваат и санкционираат прекршителите.
На состанокот беше искажана максимална поддршка за полицијата во поглед на превентивното влијание врз адолесцентите, за да се обезбеди подолгорочен мир и безбедно живеење во општината.