Исправени сме пред најчесната мисија, да создадеме општина во која еднакви ќе бидат сите граѓани. Охрид е космополитиски град и во тој дух и во духот на социјалдемократијата нашата цел е да работиме на создавање можности за сите граѓани. Тоа денеска го истакна Јован Стојаноски во првото обраќање до граѓаните како кандидат за градоначалник од редовите на СДСМ.
Стојаноски како човек кој повеќе од две децении работи во образованието, испрати уверување до граѓаните дека има визија за тоа во каква насока треба да се гради и развива Охрид.
– Ќе создадеме отворена и услужна општина за сите. Секој ќе може да се обрати до општината и навремено да ја добие својата услуга. Ја враќаме моќта и самостојноста на месните и урбаните заедници кои со зајакната правен статус ќе помогнат максимално да бидат во служба со граѓаните, рече тој.
Стојаноски нагласи дека во соработка со Владата обезбедена е помош за малите и средни претпријатија, а со тоа и нови можности и работни места.
– Работиме по план, создаваме инфраструктура за сите, а тоа ќе го постигнеме со нудење нови решенија во водоснабдувањето, санација и доградба на колекторскиот систем, изградба на фабрика за отпад, услови за достоинствена старост и гасификација на Охрид, рече порачуваќи им на граѓаните дека од 15 октомври доаѓа живот во Охрид.