Учениците, наставниците, родителите, градоначалникот на општина Центар, советници и вработени во општината роденденски го чествуваа 62-риот роденден на основното училиште „Димитар Миладинов“ и 40-тиот јубилеен роденден на општина Центар.
Најдобрите и најталентираните ученици од сите 7 основни училишта на територијата на Центар, добија стипендии по 2.500, односно 2.000 денари месечно, и тоа во текот на целата учебна година.
Оваа година општина Центар за прв пат воведе награди и за најдобро уредените училници во училиштата. Како награда беа доделени ЛЦД проектори за најдобрите, а за второ и трето пласираните – магнетни табли, ѕидни часовници и други училишни помагала.
„Општина Центар со ова ја покажува грижата за најталентираните и за најдобрите ученици и наставници. Освен овие награди, оваа општинска гарнитура ги стимулира и најдобрите спортисти, најдобрите наставници, а воведовме и стипендии за највредните ученици во 7-те основни училишта кои доаѓаат од социјално загрозени семејства“, рече градоначалникот Жерновски.
Роденденски подарок од училиштето „Димитар Миладинов“ за општина Центар е химната на општината, чиј автор е наставничката по музичко образование, Славјанка Димова, а ја изведе хорот на училиштето.
Птицата феникс, која е обележје и симбол на општина Центар, изработена во хартија од учениците, беше подарена на присутните, кои не го криеја своето изненадување и задоволство.
Митолошката птица феникс, рекоа децата, ја симболизира преродбата, а општината секогаш знае и може да даде за децата се’ што им треба – тоа се мотив и надеж, силна љубов и среќа и целосна поддршка.
Сето ова, учениците го дополнија и со музичко-ритмичката изведба „Заедно можеме“.