Кумановските стечајци блокадите и протестите ги селат во Скопје.
Со шатори ќе кампуваат пред Влада се до исполнување на нивните барања. Сакаат да ги потсетат надлежните на нивните нерешени проблеми, но и на барањето за месечен паричен надоместок на околу десет илјади граѓани во државава.
„На 10 јуни, по пети пат ќе поднесеме нов предлог закон за стечајците“, изјави претседателката на кумановските стечајци, Лилјана Георгиевска.
Георгиевска очекува дека конечно ќе проработи свеста кај надлежните и ќе се реши нивниот статус, за кој се борат веќе единаесет години.
Тие вчера на двочасовниот протест се пожалија дека единаесет годишната голгота го уништи здравјето на многу стечајци, некои се и починати.
„Поентата на Груевски е сите да починеме и да не снема“, рече на вчерашниот протест еден од стечајците.