Советот на Сојузот на синдикатите на Македонија на денешната седница донесе заклучок со кој ССМ пружа безрезервна поддршка на барањата на вработените во ОХИС.
ССМ отсекогаш настапува солидарно со барањата на работниците и активно се вклучува во изнаоѓањето поволни решенија.
Советот на ССМ, исто така, информира дека прашањето за можните решенија за вработените во ОХИС и во останатите загубари ќе биде поставено на наредната седница на Економско–социјалниот совет, се вели на крјаот на соопштението од Синдикатот.
Минатата недела беше објавен и нов, десетти по ред тендер за продажба на загубарот Охис.
Според условите во овој тендер, новиот газда ќе може да ја купи компанијата со намален број на вработени само доколку соодветно ги обештети и нема да има обврска да го надополни бројот на работници кои спогодбено си заминале.
Доколку идниот сопственик на хемискиот загубар ги прифати барањата на вработените во ОХИС, бројот на вработени од 800 ќе биде преполовен.
Минатата недела, исто така, вработените во ОХИС го продолжија штрајкот во хангарите на фабриката заради минусните температури, но тие денес повторно излегоа пред Владата, а потоа имаат намера да протестираат и пред Парламентот.
Тие бараат барем две од заостанатите плати за да можат да ги прослават во нормални услови новогодишните и божиќните празници.